Sa Muling Paghawak ng Aklat

Sa Muling Paghawak ng Aklat
ni Liza Marie M. Antonio


Sa muling paghawak ng aklat
Ang kaluluwa ko'y muling namulat
Na ang puso pala'y naging salat
Ang boses ko pala'y matagal nang namamalat


Sa muling pagbuklat ng pahina
Muli kong naalala
Ako pala'y minsang naging malaya
Ngunit ngayo'y naging isang bilanggo na


Sa muling pagbasa ng akda
Ako'y kaagad na nahalina
Na tumulad sa ginawa
Ng sumulat na makata


At dahil sa muling paghawak ng aklat
Sa muling pagbuklat ng pahina
Sa muling pagbasa ng akda
Sa wakas, nakasulat muli ako ng isang tula!